Mae Cyngor Lantra yng Nghymru yn gwneud gwaith allweddol gan ei bod hi’n hanfodol cael corff cryf o gyflogwyr sy’n gallu llywio penderfyniadau polisi a cheisio dylanwadu ar ddatblygiadau ar ran y sector. Bydd aelodau’r Cyngor hefyd yn hyrwyddo pwysigrwydd hollbwysig buddsoddi mewn sgiliau, arloesedd a thechnolegau a dulliau gweithio newydd ymhlith ffermwyr a busnesau gwledig eraill fel hanfodion er mwyn goroesi’r dirwasgiad a sicrhau llwyddiant yn y dyfodol.
Meddai Kevin Thomas, Cyfarwyddwr Cenedlaethol Lantra yng Nghymru: “Mae’n bleser croesawu Lionel fel Cadeirydd Cyngor Lantra yng Nghymru. Bydd ei brofiad yn sicrhau ein bod ni’n parhau i ddatblygu ein cysylltiadau â chyflogwyr a phartneriaid allweddol yn y sector ac yn dod o hyd i ddulliau arloesol o gynorthwyo datblygiad hyfforddiant a sgiliau yn ystod cyfnod sy’n anodd yn fasnachol i lawer o bobl.”
Mae swyddogaeth hollbwysig Lantra yn y sector yn tynnu sylw at y pryderon sy’n bodoli a materion yn ymwneud â hyfforddiant trwy weithio â phartneriaid blaenllaw. Yng Nghymru mae’r rhain yn cynnwys Cyngor Cefn Gwlad Cymru, Llywodraeth Cynulliad Cymru, Asiantaeth yr Amgylchedd Cymru, Cyswllt Ffermio, yn ogystal â chynrychiolaeth gref o blith darparwyr hyfforddiant a diwydiant.
Meddai Peter Martin, Prif Weithredwr Lantra: “Penodi Lionel yng Nghymru yw’r cam nesaf tuag at gryfhau swyddogaeth ein Cyngor Cenedlaethol. Gyda chymaint o benderfyniadau addysg, sgiliau a pholisi gwledig bellach yn cael eu cymryd ar lefel gwlad, mae’n rhaid i ni fod yng nghanol y broses o wneud penderfyniadau a sicrhau bod y canlyniadau polisi cywir yn cael eu mabwysiadu er budd y sector. Yn ystod y cyfnod economaidd anodd hwn mae’n bwysicach fyth bod llais y diwydiant yn cael ei glywed a’n bod yn diwallu anghenion y sector.”
