Cynhaliwyd y gwobrwyo yn adeilad Lantra yn y Ffair Aeaf, gyda 70 yn bresennol i weld Tomos Dion Davies, Julie Amies-Carter a Richard a Dawn Lewis yn cael eu cyhoeddi’n enillwyr.
Mae Dion eisoes wedi datblygu gwybodaeth gref o’i ddiwydiant ac yntau dim ond yn 20 oed, ac mae wedi cymryd drosodd y fferm deuluol yn Llandysul, Ceredigion. Roedd yn ddewis cyntaf i’r panel o feirniaid a dyfarnwyd iddo deitl Dysgwr Ifanc y Flwyddyn 2007.
Mae Julie Amies-Carter, o Aberystwyth, Ceredigion wedi profi ei bod yn bwysig i beidio colli ffocws. Cafodd deitl Dysgwr Gydol Oes y Flwyddyn, ar ôl buddsoddi’r pymtheg mlynedd diwethaf mewn profiadau a hyfforddiant adref a thramor.
Yn ogystal â rheoli fferm o 110 o wartheg godro a 60-70 acer o rawn, mae Richard a Dawn Lewis wedi arallgyfeirio mewn ffordd unigryw drwy ymgorffori nid yn unig llwybr fferm ond hefyd cwrs golff Frisbee i’w fferm yn Slebech, Hwlffordd!
Derbyniodd yr enillwyr wobr ariannol a thocyn hyfforddiant Lantra gwerth £500, gyda’r gweddill yn derbyn tocyn hyfforddiant gwerth £100.
Methodd Elin Jones, Gweinidog Materion Gwledig Cynulliad Cymru a mynychu’r digwyddiad ond gyrrodd eiriau o gefnogaeth "Rwyf yn cefnogi’r gwobrau yma sydd, ers eu dechreuad ym 1999, wedi mwynhau tyfiant gwych yn nhermau enwebiadau, cefnogwyr, cyhoeddusrwydd, categorïau gwobrau, presenoldeb a chefnogaeth gan ddiwydiant.
"Mae’r gwobrau yn mynd ymhell i godi proffil cyfleon gyrfa a hyfforddiant i bob oed o fewn y sector amgylcheddol a gweithio ar y tir yn pgystal ac annog pobl newydd i’r sector ymysg pethau eraill.
"Rwyf yn cymeradwyo Lantra am adnabod a gwobrwyo talent/dysgwyr eithriadol o’r sector gweithio ar y tir, ac rwyf yn gobeithio y bydd y gwobrau yn parhau i hybu ac annog hyfforddiant a chyfleon gyrfa i bob oed."
Mae enwebiadau ar gyfer cystadleuaeth y flwyddyn nesaf yn cael eu gwahodd nawr, felly os ydych yn gwybod am rywun o’r sector tir sydd wedi rhagori yn eu maes o ddysgu neu fusnes gyda chymorth hyfforddiant, ac sydd mor ysbrydoledig â Dion, Julie, Richard a Dawn, cysylltwch â hefin.hughes@lantra.co.uk am ffurflen enwebu.
